11/2/2011
دا تاريخ النهاردة , يوم مهم جداا فى تاريخ مصر ,وخاصة شباب مصر , مش عارفة اثارة هتكون ايجابية ولا سلبية
بس كل اللى متاكدة منة ان ربنا هيحمى مصر كما اعزها فى القران , على الرغم من ان الحدث مهم وفرح كل الشعب الا انى متاكدة ان جوا كل مصرى نفس المخاوف اللى جوايا , خايفين مصر تقع , خايفين المتهالكين ع السلطة يدمروها , خايفين من اى تدخل خارجى , الجميل الوحيد اللى عمرى ماهنساة لمبارك انة عيش مصر 30 سنة فى سلام , عمرى ماخفت ولا قلقت من بكرة عمرى ما مشيت فى اى شارع وانا خايفة عمرى ماقلقت , اها فعلا معا كل اللى احنا فية من بطالة ومرض وقهر بس عارفة انى هصحى الصبح الاقينى فى وسط اهلى حتى لو مش هنلاقى ناكل زى ما كان بيحصل بين كتير من معدومى الدخل فى بلدنا ومعا غلاء الاسعار كمان , بس هنام فى حضن امى واصحى بصوت ابويا واروح مدرستى معا اختى واخويا هيحمينى وكل مصرى فى بلدى اخويا بيخاف عليا شهم واصيل جنبى .
انا مش زعلانة على مبارك نفسة انا جوايا خوف من نتائج القرار دة اللى لسة اثرة ماظهرش .....
اليوم بعد 17 يوم من ثورة شعبنا شبابنا الغالى من يوم 25/1/2011 وقرارات عدت وكلام كتر وحكومات اتغيرت وفضل الشعب مصر ع التغير , يااة يامصرى بعد 30 سنة سكوت وصمت فجاءة تقول تغير وبدا يغير بردو التغير . حتى النهاية , يوم الجمعة سموها جمعة الحسم , اى حسم الموقف اى بنهاية مبارك . نعم نهاية ورحيل مبارك , مانا غيرتلكم الوزارة غيرتلكم اهو وحاكمت ناس وهغير الدستور .. بردو لا عاوزين رحيلك رحيلك يامبارك . وفى النهاية استسلم مبارك وتنحى عن رئاسة الجمهورية .
بجد, انا فى حلم ولا علم .. لا بجد بس ادعو مصر تتغير من زمن الكوسة والسرقة والنهب والمرض وتكون مدينة علم وخيرها يكون لولادها وشبابها واهلها والكل يعيش ويحلم ...
ليست هناك تعليقات:
إرسال تعليق